إحنا مثليات ومثليين وترانس وبايسكشوال وأشخاص بعيشوا تجارب جنسية وجندرية مختلفة بدنا نقول كلمتنا، كلمة واضحة وبدون تردد، بدنا نصرُخ صرخة كويرية للحرية، حريتنا كلنا اللي ما بتتجزّأ

إحنا موجودين، موجودين بالقدس ويافا وحيفا والناصرة، موجودين برام الله ونابلس بالنقب وكلّ محل بفلسطين، كنّا موجودين ودايمًا رح نكون جزء من هادا المجتمع، ومش رح نقبل لحدا يمحينا أو يلغينا

أنا كمثليّة، وجارك الترانس، وابن عمك الباي سكشوال ، وكتار من الناس حواليك اكتفينا وتعبنا نسمع الاستهزاء والمسخرة على شكلنا على علاقاتنا على حياتنا كلها

كل يوم هو معركة بالنسبة إلنا في البيت وفي المدرسة وفي الشارع وفي الشغل عشان ميولنا الجنسية وهويتنا الجندرية، ومع هادا كلّه منضل قوايا ومنكمّل

الاحتلال بمحي وجودنا وهويتنا كفلسطينيات وفلسطينيين، وفئات من المجتمع بتنكر وجودنا وبتمحينا من المجتمع كمثليين وترانس، بس إحنا مع هيك رح نضل بهالبلد ورح نضل بمجتمعنا

حياتي وتجاربي الجنسية العاطفية مش غلطة ولا عار الغلطة والعار هو العنف المجتمعي ضد المثليين والمثليات والترانس والنساء

أنا مش الآخر، أنا مش الغريب، أنا مش من برا، أنا مش من الفضاء، أنا جزء من المجتمع ومنكم وفيكم وبدي أعيش في هادا المجتمع بأمان

عشان كل العنف اللي منشوفه كل يوم على جميع أشكاله، والتحريض الكبير اللي توجّه ضدّنا آخر فترة ، لكلّ الناس اللي اشتركت بالنقاشات على السوشال ميديا ودافعت عن الحريات اللي حابين وحابات يحولوا هذا الدعم للشارع ولأرض الواقع انضمولنا بوقفة احتجاجية يوم الأربعاء الساعة ستة بساحة الأسير بحيفا. انضمّولنا بصرخة كويرية للحرية.